Shirikisho la Soka Tanzania (TFF) imesema kocha Emmanuel Amunike ataendelea kuifundisha timu hiyo kwa tofauti na maoni ya wadau mbalimbali ambao wametaka kocha huyo kubadilishwa.
Mkurugenzi wa Ufundi wa TFF, Ammy Ninje amesema kuwa malengo waliyompa Amunike ya kuhakikisha timu hiyo katika fainali za Afrika mwaka huu (Afcon) yametimia na hakuna haja ya kumbadili kocha huyo.
Ninje alisema kuwa suala la kocha kubadilishwa halina nafasi katika kipindi hiki kwani TFF na wadau wengi wa soka nchini wamefarijika baada ya kufuzu katika fainali za Afcon kwa mara ya kwanza kwa kipindi cha miaka 39.
Alisema kuwa kwa sasa TFF inajipanga kuona jinsi gani kocha huyo anaiandaa timu hiyo ili kufanya vyema katika mashindano ya hayo yaliyopangwa kufanyika nchini Misri kuanzia Juni 21 mpaka Julai 19.
"Mimi nimeshangazwa sana na mihamko kwenye mitandao ya kijamii. Sijui wanaotaka Amunike aondolewe wametumia vigezo gani. Sababu zao hazina mashiko na sisi tunaendelea naye mpaka katika fainali ya mashindano ya Afcon," alisema Ninje.
Alisema kuwa mjadala huo hauna tija kwa maendeleo ya soka nchini kwani nchi yetu imeshuhudia makocha wengi kutoka katika mataifa tofauti wakishindwa kufikia hatua ambayo Amunike ametufikisha kwa sasa.
"Lazima tujivunie kupata mafanikio haya. Malengo yetu yametimia, sasa sijui baadhi ya Watanzania wanataka nini katika masuala ya soka. Imenishangaza sana, lakini sisi hatufanyi kazi kwa kupitia mihamko ya watu, ushahidi upo wa Amunike alichokifanya," alisema.
Alisema kuwa mpango wa TFF kwa sasa kuhakikisha timu inaandaliwa kwa umakini zaidi na hawafikirii kuongeza wachezaji.
"Kama tutaongeza wachezaji, basi ni wachache sana, maana mpira wa miguu una mambo mengi mbali ya majeraha," alisema Ninje.
