Ule msemo kuwa Simba haifungiki inapocheza katika dimba la Taifa hata ije FC Barcelona umedhihri kwa mara nyingine leo baada ya mabingwa hao wa nchi kuchomoza na ushindi wa mabao 2-1 dhidi ya Vita Club na kutinga robo fainali ya michuano ya ligi ya mabingwa barani Afrika
Alikuwa ni Clatous Chama 'Triple C' aliyeipeleka Simba robo fainali kwa kufunga bao safi katika dakika za lala salama
Krosi ya chini ya nahodha John Bocco ilipishana na kiungo Haruna Niyonzima na kumkuta Chama aliyeujaza mpira kimiani upande wa kulia wa mlinda lango wa Vita
AS Vita walitangulia kufunga bao la kuongoza kwenye dakika ya 13 kupitia kwa Kazadi Kasengu kabla Mohammed Hussein 'Zimbwe Jr' hajaisawazishia Simba kwenye dakika ya 33 akimalizia pasi murua iliyopigwa na Mzamiru Yassin
Leo Simba imedhihrisha iko tayari kuchuana na vigogo wa soka barani Afrika ikiwa miongoni mwa timu nane bora zilizotinga robo fainali
Simba imetinga robo fainali ikishika nafasi ya pili kundi D nyuma ya Al Ahly ambayo imeichapa JS Saoura mabao 3-0
Aidha mashabiki nao wametimiza wajibu wao kwa kuujaza uwanja wa Taifa leo. Hakika uzalendo wa mashabiki wa Simba kwa timu yao ni wa kujivunia
