Katika mchezo wa juzi, JS Saoura walipata ahueni baada ya kukosekana kwa Mganda Emmanuel Okwi na huenda ndio ikawa sababu iliyofanya safu yao ya ulinzi icheze kwa kujiamini sana baada ya kukosa kashikashi kutoka kwa washambuliaji wa Simba
Mkongwe Zamoyoni Mogella ambaye ni mshambuliaji wa zamani wa Simba, amesema mchezo dhidi ya JS Soaura umedhihirisha umuhimu wa Okwi katika kikosi cha timu hiyo hasa kwa michezo ya ligi ya mabingwa
"Kukosekana kwa Okwi kwenye mchezo dhidi ya JS Saoura kulisababisha safu ya ushambuliaji ya Simba kukosa makali," amesema Mogella
"Ni kweli Kagere ni mpambanaji lakini Okwi ana kipaji cha pekee. Ni mbunifu, 'purukushani' zake ndizo zinazowanufaisha Kagere na Bocco kuweza kufunga kwa urahisi."
Okwi alishindwa kwenda Algeria na kikosi cha Simba kutokana na kusumbuliwa na jeraha la goti alilopata kwenye mchezo wa ligi kuu dhidi ya Lipuli Fc
Amekuwa nje kwa wiki mbili, bado hatma yake haijafahamika kuelekea mchezo dhidi ya Vita Club
Wachezaji Juuko Murshid na Erasto Nyoni nao hawakusafiri Algeria lakini huenda wakawa tayari kwa mchezo huo wa Jumamosi
Juuko amemaliza adhabu ya kadi mbili za njano wakati Nyoni aliyepona majeraha ya goti hivi karibuni, alipewa muda zaidi wa kufanya mazoezi ili aweze kuwa 'fit'
Kiungo Jonas Mkude yeye atawakosa Vita Club kwa kuwa ana kadi mbili za njano
