Mwili wa aliyekuwa mtangazaji wa Clouds FM Ephraim Kibonde unatarajiwa kuzikwa leo katika makaburi ya Kinondoni jijini Dar es salaam
Kibonde ambaye pia alikuwa mtangazaji/mchambuzi wa soka kin'gamuzi cha DSTV kwa lugha ya kiswahili, alifariki mkoani Mwanza juzi katika Hospitali ya Bugando baada ya kuugua kwa muda mfupi
Msiba upo nyumbani kwake Mbezi Africana ambapo jana Waziri Mkuu Mh Majaliwa Kassim alifika kutoa salamu za rambirambi kwa niaba ya Rais wa Jamhuri ya Muungano wa Tanzania Dk John Magufuli
Msemaji wa familia, Saudiri Mwakaje alisema mwili utafika nyumbani Mbezi Africana saa 4:30 asubuhi kutoka Hospitali ya Lugalo, saa sita watu watapata chakula cha mchana ikifuatiwa na ibada na kuaga baada ya hapo safari ya makaburini itaanza.
Kifo cha Kibonde kimewashtua wengi kutokana na ukweli kwamba siku tatu kabla ya umauti kumfika alikuwa wilayani Bukoba akisimamia shughuli ya maziko ya aliyekuwa Mkurugenzi wa vipindi na uzalishaji Clouds Media marehemu Ruge Mutahaba aliyefariki Februari 26 Afrika Kusini alikokuwa akipatiwa matibabu
Kibonde alisimamia hafla ya kuagwa mwili wa Ruge iliyofanyika jijini Dar es salaam na baadae kusimamia hafla ya maziko wilayani Bukoba
Alianza kuugua wakati shughuli za maziko ya Ruge zikiendelea
Taarifa iliyotolewa na familia imeeleza marehemu alibainika kuwa na uvimbe tumboni
