JS Saoura imeingia mchecheto baada ya kuwasili kikosi cha Simba nchini Algeria tayari kwa mchezo wa ligi ya mabingwa utakaopigwa keshokutwa Jumamosi katika dimba la Agosti 20 1955
Karim Zaoui ndiye kocha Mkuu wa timu hiyo kwa sasa ambapo alichukua nafasi ya Nabil Neghiz aliyetimuliwa baada ya kipigo cha mabao 3-0 kutoka kwa Simba kwenye mchezo wa raundi ya kwanza uliopigwa uwanja wa Taifa
Mtandao wa JS Saoura umeripoti kuwa kocha huyo amewatahadharisha mabeki wa timu hiyo kuwa wasipomchunga Meddie Kagere wanaweza kupoteza mchezo wa keshokutwa
Kagere aliwafunga mabao mawili kwenye mchezo wa kwanza
Mchezo huo baina ya timu hizo utapigwa Jumamosi hii, mjini Bechar, utachezeshwa na waamuzi kutoka Jamhuri ya Kidemokrasia ya Kongo (DRC).
Waamuzi hao ni Jean-Jacques Ndala Ngambo atakayepuliza kipyenga na mshika kibendera namba moja, Olivier Safari Kabene, wakati mshika kibendera wa pili, Soulaimane Amaldine anatokea Comoro.
Simba SC inashika nafasi ya pili kwenye msimamo wa Kundi D, huku Al Ahly ambayo wikiendi hii watakuwa ugenini kwa AS Vita mjini Kinshasa, ndiyo inaongoza kundi hilo kwa pointi zao saba.
JS Saoura, yenye mshambuliaji Mtanzania, Thomas Ulimwengu, inashika nafasi ya tatu, ikizidiwa pointi moja na Simba SC na yenyewe ikiizidi pointi moja AS Vita inayoshika mkia.
