Rais wa Jamhuri ya Muungano wa Tanzania Dk John Magufuli ameshangazwa na ukimya wa Jeshi la Polisi kufuatia tukio la kutekwa kwa Mfanyabiashara na Mwekezaji wa klabu ya Simba Mohammed Dewji 'Mo'
Akizungumza jijini Dar es salaam leo wakati wa zoezi la kuwaapisha Makamishna wa juu wa jeshi la Polisi pamoja na Mawaziri wapya wawili akiwemo Waziri wa Katiba na Sheria na Dkt Agustine Mahiga pamoja na Waziri wa Mambo ya nje na ushirikiano wa Afrika Mashariki Profesa Paramagamba Kabudi, Rais Magufuli amehoji ni kwa nini mpaka leo wahusika hawajafikishwa Mahakamani
"Jeshi la Polisi linatakiwa kuelewa kuwa Watanzania sio wajinga, kama suala la kutekwa kwa Mo Dewji linaacha maswali, tuliambiwa alitekwa na wazungu lakini lilipoisha haikueleweka, mwishoni aliyetekwa alionekana anakunywa chai na Mambosasa," amesema Rais Magufuli
"Tulioneshwa nyumba na dereva lakini hadi leo hakuna aliyepelekwa Mahakamani hata kama Watanzania watanyamaza lakini mioyo yao haitakuwa sawa", ameongeza Rais Magufuli
Oktoba 2018, akiwa Jijini Dar es salaam mfanyabiashara Mohemed Dewji alitekwa na watu wasiojulikana ambao walitajwa kuwa ni raia kutoka nje ya nchi lakini baadaye alipatikana maeneo ya Gymkhana Jiji Dar es salaam.
