Mabingwa wa soka Tanzania Bara Simba wameendeleza vipigo kwa timu zinazoshiriki ligi kuu ya Tanzania Bara baada ya leo kuifumua Stand United mabao 2-0 katika mchezo uliopigwa dimba la CCM Kambarage mkoani Shinyanga
Licha ya kufanikiwa kuizuia Simba isifunge kwenye dakika 45 za kipindi cha kwanza, Stand 'ilichemsha' katika kipindi cha pili Simba ikifunga mabao yake yote kwenye kipindi hicho
Nahodha John Bocco ndiye aliyekuwa shujaa wa kikosi cha Simba leo akifunga mabao yote mawili
Bocco aliitanguliza Simba kwa mkwaju wa penati kwenye dakika ya 52 baada ya mlinzi wa Stand United kuunawa mpira ndani ya eneo la hatari
Stand walionekana kupania mchezo huo, walijikuta wakiokota mpira kambani kwa mara ya pili kwenye dakika ya 66 mfungaji akiwa Bocco
Matokeo hayo yameendeleza rekodi ya ushindi mfululizo kwa Simba sasa ikiwa imeshinda michezo yote iliyocheza tangu kuanza kwa mwaka 2019
Bocco ameendelea kuwasogelea vinara wa mabao katika mbio za kuwania kiatu cha dhahabu baada ya kufikisha mabao tisa
Simba imefikisha alama 51 baada ya kushuka dimbani mara 20, iko nyuma ya Azam Fc kwa tofauti ya alama mbili tu. Azam Fc imecheza michezo sita zaidi ya Simba
