Baada ya kukosolewa sana kutokana na kucheza chini ya kiwango kwenye mchezo wa watani wa jadi dhidi ya Yanga uliopigwa Februari 16, kiungo Clatous Chama amesema ataendelea kujituma na kufanya vizuri kadiri ya uwezo wake huku akiwataka wale wanaomkosoa kwa kutofanya vizuri kwenye mchezo mmoja watambue kuwa yeye ni binadamu
Juzi Chama aliwajibu wakosoaji hao kwa kupachika mabao mawili kwenye ushindi wa mabao 3-1 iliyopata Simba dhidi ya Lipuli Fc
"Hakuna mchezaji anayependa kucheza katika kiwango cha chini, kila siku mchezaji hujipanga kuonyesha kiwango cha juu, lakini mazingira na wakati uliopo huchangia kuonekana tofauti, hapa ni Afrika na si Ulaya, mimi bado ni Chama yule yule," amesema Chama
"Nashukuru napata ushirikiano kutoka kwa wachezaji na benchi la Ufundi, umoja wetu ndio unaotufanya tuzidi kufanya vizuri. Naamini tutaendelea kufanya vizuri na kutimiza lengo letu la kutetea ubingwa msimu huu"
Kikosi cha Simba kiliwasili mkoani Singida jana na kitajifua mkoani humo kwa siku mbili kabla ya kuelekea Shinyanga kuikabili Stand United kwenye mchezo wa ligi kuu ya Tanzania Bara utakaopigwa Jumapili, Marhc 03 2019 katika uwanja wa CCM Kambarage
