Kocha Mkuu wa Simba Patrick Aussems amewapongeza vijana wake kwa kufanikiwa kuondoka na ushindi wa mabao 3-0 dhidi ya African Lyon katika mchezo wa ligi kuu ya Tanzania Bara uliopigwa dimba la Sheikh Amri Abeid
Aussems amesema malengo ya kikosi chake ilikuwa ni kushinda mchezo huo, matokeo hayo yamempa faraja
Katika mchezo wa leo Simba ilitumia mipira mirefu zaidi kuliko ilivyozoeleka. Aussems amesema walilazimika kutumia mfumo huo kutokana na changamoto ya uwanja
"Muhimu zaidi ni tumepata alama tatu. Tulijua kwamba uwanja sio mzuri na hivyo tulibadili kidogo aina ya uchezaji wetu kwa kucheza mipira mirefu na tulifanikiwa kufanya hilo.
"Nimeridhishwa na kiwango cha wachezaji na kiukweli imekuwa siku nzuri," alisema Aussems baada ya mchezo huo
Ushindi huo umepunguza tofauti ya pointi dhidi ya timu zailizo kileleni.
Simba imefikisha alama 42, alama nane nyuma ya Azam Fc inayoshika nafasi ya pili ikiwa na alama 50, na alama 16 nyuma ya Yanga inayoongoza ligi ikiwa na alama 58
Hata hivyo Simba ina michezo saba pungufu dhidi ya Yanga na Azam FC
