Mshambuliaji wa Simba Emmanuel Okwi amesema baada ya kumalizana na watani zao Yanga kwa ushindi wa bao 1-0, lengo lao ni kuhakikisha wanashinda michezo yote ya viporo ili kuweza kuwaondoa wapinzani wao kileleni
Okwi amesema katika mchezo wa kesho dhidi ya African Lyon na michezo mingine itakayofuata, hawapaswi kufanya makosa ili waweze kufikia malengo yao
"Tumemalizana na Yanga, kwa sasa hatuwafikirii tena, kilichobaki ni kupigania pointi katika michezo iliyobaki kuhakikisha tunamfikia mpinzani wetu, tunajua yupo juu yetu lakini tutapambana kumfikia," amesema Okwi.
"Hatuangalii idadi ya mechi za viporo tulizonazo, bali tunacheza mechi moja baada ya nyingine ili kutafuta pointi na kila mchezo kwetu tutapambana, lengo ni pointi tatu kama tulivyochukua kwa Yanga na huko kwingine tunazitaka"
Simba ina faida ya michezo nane dhidi ya Yanga inayoongoza ligi ikiwa na alama 58, alama 19 zaidi ya Simba inayoshika nafasi ya tatu ikiwa na alama 39
Kimahesabu, Simba inaweza kuiondoa Yanga kileleni iwapo itashinda angalau michezo saba ya viporo
