Leo mabingwa wa Tanzania Bara Simba wanashuka katika dimba la Taifa kuikabili Al Ahly kwenye mchezo wa kundi D, raundi ya nne michuano ya ligi ya mabingwa barani Afrika
Ni mchezo ambao utabainisha hatma ya Simba kuelekea hatua ya robo fainali ya michuano hiyo mikubwa kabisa kwa ngazi ya vilabu barani Afrika
Kocha Mkuu wa Simba Patrick Aussems pamoja na wachezaji wameahidi kupambana mpaka dakika ya mwisho kuhakikisha wanachukua alama zote tatu dhidi ya Al Ahly leo.
Mashabiki kutoka kila pembe ya jiji la Dar es salaam na mikoa ya jirani wameaswa kujitokeza kwa wingi uwanja wa Taifa kuwapa sapoti wapambanaji wetu ambao watakuwa wakiiwakilisha Tanzania katika mchezo huo
Kuna umuhimu mkubwa kwa uwanja wa Taifa leo kufurika na kuzizima kwa kelele za mashabiki kuanzia dakika ya kwanza ya mchezo mpaka dakika ya 90
Hakuna jambo lisilowezekana, kama timu nyingi katika michuano hii zinashinda michezo ya nyumbani kwa nini Simba isiweze?
Ushindi wa mabao 3-0 iliyopata katika mchezo wa kwanza dhidi ya JS Saoura unathibitisha uwezo wa Simba inapocheza uwanja wa Taifa
JS Saoura walitoka sare ya bao 1-1 dhidi ya hii Al Ahly katika mchezo uliopigwa nchini Algeria. Wanafungika, bila shaka leo ni zamu yao kupoteza mchezo dhidi ya Mnyama
