Licha ya kufanya mazoezi ya pamoja kwa siku moja tangu watoke nchini Misri, kikosi cha Simba leo kitashuka katika uwanja wa Taifa kuikabili Mwadui Fc kwenye mchezo wa ligi kuu ya Tanzania Bara.
Simba ilifanya mazoezi ikiwa na kikosi chake kamili jana baada ya wachezaji wa timu hiyo kurejea kutoka Misri kwa awamu tofauti kutokana na changamoto ya usafiri
Kocha Mkuu wa Simba Patrick Aussems amesema wanahitaji kushinda mchezo wa leo
Amesema ni lazima wachezaji wake wajitume kuhakikisha wanapata matokeo katika mchezo huo utakaoanza saa moja usiku
Aussems amesema licha ya timu yake kukabiliwa na ratiba ngumu, wanapaswa kufanya vizuri katika michezo yao ili kutimiza lengo la kutetea ubingwa
"Huu ni mchezo muhimu sana kwetu unajua tuna lengo la kutetea ubingwa na jana ndiyo siku pekee tuliyoweza kufanya mazoezi kwa pamoja tangu turudi nchini kutokana na utofauti wa safari ya kurejea nchini tukitokea Misri," amesema Aussems."
"Tuna ratiba ngumu katika mechi zetu ndani ya wiki mbili zijazo ukiangalia tunatakiwa kucheza mechi sita ndani ya siku 18 hii ni ngumu lakini hakuna namna ni lazima tupambane"
