Vipigo mfululizo vya mabao 5-0 katika michuano ya ligi ya mabingwa barani Afrika vimewasononesha mashabiki wa Simba ambao walikuwa na imani kubwa na timu yao msimu huu
Hii ni kutokana na uwekezaji mkubwa uliofanywa na mwekezaji wa klabu hiyo Bilionea Mohammed Dewji 'MO'.
Ni kweli wengi tuliamini Simba ilikuwa na nafasi ndogo ya kushinda michezo dhidi ya Vita Club na Al Ahly lakini tulikuwa na matumaini ya timu kufanya vizuri hasa baada ya kiwango kizuri walichoonyesha kwenye mchezo wa kwanza dhidi ya JS Saoura
Lakini katika michezo miwili iliyopita mambo yamekuwa tofauti kabisa kinyume na matarajio ya wengi
Kocha Mkuu wa Simba Patrick Aussems hawezi kukwepa lawama za matokeo haya mabaya.
Kwenye mchezo dhidi ya Vita Club Simba Aussems alilaumiwa kwa kushindwa kutumia mbinu sahihi kupelekea Simba ikafungwa mabao 5-0
Jana tena dhidi ya Al Ahly, makosa yaleyale aliyofanya kwenye mchezo wa kwanza ameyarudia tena
Wakufunzi wengi wa soka hubadili mbinu kufuatana na uwezo wa wapinzani wao. Huwezi kutumia mfumo wa kushambulia ugenini unapocheza na timu kama Al Ahly
Simba sio timu ya kuruhusu mabao 10 katika michezo miwili.
Msimu uliopita Simba ilishiriki michuano ya Shirikisho idadi kubwa ya wachezaji ni hawahawa tofauti ni kocha tu
Ingawa haikufanikiwa kutinga hatua ya makundi lakini Simba ilitolewa kwa faida ya mabao ya ugenini baada ya kulazimisha suluhu ya 0-0 dhidi ya Al Masry huko huko Misri
Naamini kama leo Simba ingekuwa bado chini ya Lechantre, kusingekuwa na hivi vipigo vya aibu. Lakini tunaheshimu uamuzi wa uongozi wa Simba kwa kuachana na kocha huyo ambaye gharama za kumhudumia zilikuwa kubwa kuliko uwezo wa klabu
Leo hii wengi wanajiuliza kwa nini kocha Aussems hataki msaidizi?
Wakati mwingine hutokea kocha akaishiwa mbinu lakini unapokuwa na msaidizi ataweza kukupa mawazo mbadala. Ndio maana Lechantre na Masudi Djuma walifanikiwa kwa sababu walishirikiana vizuri.
Lechantre alipotua Simba alimkuta Djuma akitumia mfumo wa 3-5-2 ambao ulikuwa ukiipa matokeo Simba. Lechantre hakuubadili ingawa alikuwa akifahamika yeye ni muumini wa 4-4-2
Ni vyema uongozi wa Simba ukashauriana na kocha Aussems juu ya umuhimu wa kuwa na kocha msaidizi ambaye atampa mawazo mbadala pale mambo yanapoharibika
Leo hii Simba inapofunwga au hata kuzidiwa huoni mabadiliko ya kiuchezaji, inaendelea kucheza hivyo hivyo
Kwa vipigo hivi, Aussems hawezi kukwepa lawama ingawa wachezaji nao wana sehemu yao ya lawana kwa kuwa ni wao waliokuwa dimbani.
Aidha matokeo haya yasiivuruge Simba, yatumike kusahihisha makosa yaliyoonekana.
Ikumbukwe bado Simba itachuana na timu hizo hapa jijini Dar es salaam kwenye dimba la Taifa
Nafasi ya kufanya vizuri nyumbani ipo, muhimu ni kwa benchi la ufundi kufanyia kazi mapungufu pamoja na kupokea ushauri wa wadau
