Kocha Mkuu wa Simba Patrick Aussems amesema wanatambua mchezo wa leo dhidi ya Al Ahly hautakuwa mwepesi kutokana na ubora wa wapinzani wao ambao wamekuwa na mwendelezo mzuri katika kipindi cha miaka 10 iliyopita
Hata hivyo amesema Simba imejiandaa kikamilifu kuwapa Waarabu hao mtihani na kusisitiza kuwa hawakwenda Misri kutalii
"Tupo tayari kwa mchezo dhidi ya Al Ahly, nimewaambia wachezaji wangu tupo vitani tunacheza na timu bora yenye historia kubwa Afrika," Aussems alisema kwenye mkutano wa waandishi wa habari jana
"Tunawaheshimu wapinzani wetu lakini wasiwe na hofu yeyote, tunahitaji mapambano haswa kila moja ajitume na tunatakiwa tucheze soka la kasi na kushambulia mpira ni mbinu"
"Tinahitaji kupata matokeo mazuri ili kuwa na nafasi ya kusonga mbele kwenye hatua inayofuata ya michuano hii"
Naye kiungo Haruna Niyonzima ambaye akizungumza kwa niaba ya nahodha John Bocco, amesema hali za wachezaji ziko vizuri na hakuna majeruhi
Amesema uamuzi wa timu kuwahi kwenda Misri umekuwa na faida kwao kwani wameweza kuizoea hali ya hewa ya baridi kali
Jana jioni Simba ilifanya mazoezi ya mwisho kwenye dimba la Borg El Arab litakalotumika kwenye mtanange huo utakaopigwa leo saa nne usiku kwa saa za Tanzania
