Kerr amtamani Tshabalala

Beki wa kushoto wa Simba Mohamed Hussein 'Tshabalala' anawindwa na miamba ya soka nchini Kenya Gor Mahia, baada ya kocha wa timu hiyo Muingereza Dylan Kerr, kuonyesha kuvutiwa na kiwango cha nahodha huyo msaidizi wa vinara wa ligi kuu Tanzania Bara.

Aidha katika mahojiano na mtandao wa GOALTshabalala amesema kama inatokea nafasi hiyo yupo tayari kwasababu Gor Mahia ni klabu kubwa Afrika Mashariki na nifuraha kubwa miongoni mwa wachezaji wakigeni wanaochezea timu hiyo yenye historia na mafanikio makubwa nchini humo.

"Kwanini nikatae kwasababu mpira ndiyo kazi yangu na Gor Mahia ni timu kubwa yenye hadhi kama ya Simba, kwahiyo sioni sababu ya kugoma zaidi nitafurahi kwasababu nitakwenda kujiongezea ujuzi kwa kukutana na changamoto mpya kwenye ligi nyingine," amesema Tshabalala.

Beki huyo ambaye ni mshindi wa tuzo ya mchezaji bora wa ligi ya Vodacom msimu uliopita amesema bado hajapata taarifa yoyote ya yeye kutakiwa na mabingwa hao wa Kenya, lakini endapo itazipata taarifa mapema atahakikisha anakwenda Nairobi kwa ajili ya kukamilisha mazungumzo na taratibu nyingine za kujiunga na miamba hao wa kenya.

Kerr amewahi kuifundisha klabu ya Simba, na kwa bahati mbaya alitimuliwa baada ya mzunguko wa kwanza, kumalizika na nafasi yake kuchukuliwa na Mganda Jackson Mayanja.

Kocha huyo amekuwa na mapenzi makubwa na wachezaji wa Tanzania na Afrika kwa ujuma kutokana na namna anavyofanya nao kazi kwa upendo.