Baada ya kumalizika kwa michuano ya SportPesa Cup, Simba ikifanikiwa kumaliza nafasi ya tatu, mabingwa hao watetezi ligi kuu ya Tanzania Bara wanajiandaa na safari ya kuelekea nchini Misri kuwakabili mabingwa wenzao Al Ahly katika mchezo wa ligi ya mabingwa, kundi D
Simba itachuana na Al Ahly Februari 02
Kocha Mkuu wa Simba Patrick Aussems amesema licha ya kufanya maandalizi ya kimchezo, wanajiandaa 'kisaikolojia' kukabiliana na maamuzi ya 'hovyo' kutoka kwa waamuzi watakao-chezesha mchezo huo
Aussems amesema ni kawaida kwa timu zinazokwenda kucheza Misri katika michuano ya vilabu barani Afrika kukumbana na changamoto hiyo
AS Vita ilipokwenda Misri ililazwa mabao 2-0 katika mchezo ambao mlinzi wa timu hiyo, Charles Kalonji alipewa kadi nyekundu tata mapema tu kwenye kipindi cha kwanza
"Tunatakiwa kuwa sawa kisaikolojia. Siku zote unapocheza na timu kama Al Ahly unatakiwa kutambua kuwa kabla ya mchezo kuanza wao wanakuwa mbele kwa bao moja," amesema Aussems
"Hapa namaanisha mpira ukianza akili yetu inatakiwa kuanza kutafuta bao la kusawazisha kwani lazima watapewa motisha na waamuzi"
Simba inahitaji alama moja kutoka michezo yake miwili ya ugenini huku ikihakikisha inashinda michezo yote miwili ya nyumbani kujiwekea mazingira ya kutinga robo fainali ya michuano hiyo
