Mkurugenzi wa utawala na udhibiti wa SportPesa Abbasi Tarimba amezitaka timu zinazoshiriki michuano hiyo kutoka hapa Tanzania kuhakikisha mwaka huu zinabakisha ubingwa hapa nchini.
Michuano ya SportPesa Super Cup inaingia msimu wa tatu kesho kwa michezo miwili kupigwa kwenye dimba la Taifa
Mchezo wa kwanza unaotarajiwa kuanza saa nane utakuwa kati ya Singida United dhidi ya Bandari Fc kisha kufuatiwa na mchezo wa Yanga dhidi ya K Sharks
Keshokutwa Jumatano kutakuwa na michezo mingine miwili ambapo mchezo wa mapema saa nane ni kati ya Mbao Fc dhidi ya Gor Mahia na utafuatiwa na mchezo kati ya Simba dhidi ya AFC Leopards
Katika msimu wake wa kwanza michuano hiyo ilifanyika hapa Tanzania na Gor Mahia ikaibuka washindi na wakashinda tena michuano hiyo ilipofanyika nchini Kenya mwaka jana katika msimu wa pili
Tarimba amesema timu za Tanzania hazipaswi kuipuuzia michuano hiyo kwa kutumia vikosi vya pili wakati wenzao Wakenya wanafahamu umuhimu wake
"Haiwezekani tena safari hii ubingwa wa michuano hii ukaenda Kenya kama ilivyofanyika miaka miwili iliyopita. Ni lazima timu za nchini kupambana kuhakikisha wanaubakisha ubingwa hapa nchini," amesema Tarimba kwenye Mkutano na Waandishi wa habari leo
"Tayari nimekutana na viongozi wa Simba, Yanga, Mbao FC na Singida Utd nikiwasisitizia ubingwa ubaki nyumbani.
"Nimewaambia waache mzaha kabisa kwa kutumia wachezaji wa vikosi vya pili na badala yake kuwatumia wale wa kikosi cha kwanza.
"Mara kadhaa tumeziona Simba na Yanga zikitumia wachezaji wa kikosi cha pili, hivyo mwaka huu hatutaki kitu hicho kitokee kikubwa tunataka ubingwa"
Bingwa wa michuano hiyo atajinyakulia kitita cha Mil 70 pamoja na kukata tiketi ya kuchuana na Everton Fc inayoshiriki ligi kuu ya Uingereza
