Afisa Habari wa klabu ya Simba Haji Manara amesema kipigo cha mabao 5-0 ilichopokea Simba kutoka klabu ya Vita jana ni matokeo mabaya sana lakini Wana Msimbazi hawapaswi kukata tamaa
"Mpira ni mchezo wa makosa, tumefanya makosa wenzetu wameyatumia kutuadhibu," amesema Manara
"Lakini hatupaswi kukata tamaa, tutajipanga ili tuweze kufanya vizuri michezo ijayo"
"Tuna michezo miwili nyumbani na mingine miwili ugenini. Tumepoteza pambano na sio vita"
Naye kocha Msaidizi wa AS Vital Club Raul Shungu ametaja sababu iliyoiponza Simba kwenye mchezo wa jana
Shungu aliyewahi kufanya kazi nchini katika klabu ya Yanga amesema aliiangalia Simba na kubaini ni nzuri lakini kilichowaponza jana ni kutokuwa na mpango mzuri wa kutengeneza mashambulizi
"Walikuwa na uwezo mkubwa wa kumiliki mpira. Walipiga pasi nyingi zisizo na faida kwani hawakuwa wakisogea mbele. Pia walikuwa wakicheza taratibu sana",amesema
"Sisi tulipopata mpira tulitumia udhaifu wao kwa kupeleka mashambulizi ya kasi langoni kwao,"amesema
Kocha Mkuu wa Simba Patrick Aussems ana kazi ya kufanya kabla timu hiyo kwenda nchini Misri kuikabili Al Ahly Februari 02 2019
Aussems anapaswa kurekebisha makosa ya safu ya ulinzi na sehemu ya kiungo ambayo haikuwa katika ubora wake katika mchezo wa jana
Aidha matokeo hayo ya ugenini yasiiondoe Simba mchezoni kwani katika michuano hii kila timu imejizatiti kushinda michezo yao ya nyumbani
