Kocha Mkuu wa Simba Patrick Aussems amesema kikosi chake kina matumaini ya kufanya vizuri kwenye mchezo wa kesho wa ligi ya mabingwa dhidi ya AS Vital Club
Simba iko nchini Congo tangu jana ikiendelea na maandalizi ya mchezo huo unaosubiriwa kwa hamu na mashabiki wa soka nchini
Aussems amesema amevutiwa na mwitikio wa wachezaji wake katika mazoezi maalum anayowapa kuwakabili Wacongomani hao ambao wamekuwa wakifanya vizuri wanapocheza kwenye uwanja wao wa nyumbani
Amesema ushindi mnono waliopata kwenye mchezo wa kwanza dhidi ya JS Saoura umeongeza utulivu kwa kikosi chake
"Tumejiandaa kikamilifu, vijana wangu wamepata maelekezo yote kwa ajili ya mchezo huo, na wako tayari"
"Tulishinda mchezo wa kwanza nyumbani, wapinzani wetu walifungwa. Tunajua watakuwa na presha ya kupata ushindi, tutacheza kwa tahadhari kubwa kuhakikisha tunafanya vizuri kwenye mchezo huo," amesema Aussems
Vinara hao wa kundi D walitua jana nchini Congo na jioni kujifua kwenye dimba la Stade des Martyrs ambapo mchezo huo utapigwa
Leo Simba itafanya mazoezi yake ya mwisho katika uwanja huo huo
