Huku wakiwa wanakabiliwa na mechi za mashindano ya Ligi ya Mabingwa Afrika katika hatua ya makundi, mabingwa watetezi wa Ligi Kuu wametakiwa kutokubali kuwa na idadi "kubwa ya viporo" vya ligi hiyo ya juu Tanzania Bara.
Simba iko Kundi D ikiwa na JS Saoura ya Algeria, Al Ahly (Misri) na AS Vita ya Jamhuri ya Kidemokrasia ya Kongo (DRC).
Kocha Mkuu wa Kagera Sugar, Mecky Maxime ameitaka Simba isikubali kurundikiwa michezo ya viporo kwani endapo wataendelea kubaki nyuma, watawapa mwanya wapinzani wao kuwa katika nafasi nzuri ya kutwaa ubingwa wa Ligi Kuu.
Maxime alisema kuwa kucheza mechi katikati, zitaisaidia Simba kujiweka imara kama ilivyokubali kucheza baadhi ya michezo katika mashindano ya Kombe la Mapinduzi iliyomalizika hivi karibuni huko Zanzibar.
"Kwa maoni yangu, Simba inajiweka katika nafasi mbaya, tofauti ya mechi zake na timu nyingine ni kubwa, lakini kiufundi haitawasaidia kukaa bila kucheza mechi za ushindani," alisema beki huyo wa zamani wa Mtibwa Sugar na Timu ya Taifa ya Tanzania (Taifa Stars).
Aliongeza kuwa Simba inatakiwa kuacha woga, icheze mechi za Ligi Kuu Bara na vile vile za Ligi ya Mabingwa Afrika ili kuonyesha kwamba wako tayari katika mapambano.
Hata hivyo, Maxime aliwapongeza wachezaji wa Simba kwa hatua waliyofika na kuwakumbusha kutobweteka kwa sababu bado wana safari ndefu.
Kikosi cha Simba kinatarajia kuondoka nchini leo asubuhi kuelekea Kinshasa ili kuwavaa wenyeji AS Vita katika mchezo wa pili wa Kundi D utakaochezwa Jumamosi.
