Mshambuliaji Adam Salamba ambaye anatabiriwa kuja kuwa mmoja wa wachezaji tegemeo kwa Taifa, amewataka mashabiki Simba wasimlaumu pale anapocheza chini ya kiwango kwani siku hazifanani
Salamba amekosolewa na mashabiki wa timu hiyo kwa kushindwa kuisaidia Simba kwenye michuano ya kombe la Mapinduzi iliyomalizika Januari 13 kwa Azam kutwaa taji hilo kwa kuifunga Simba mabao 2-1 kwenye mchezo wa fainali
Salamba amesema sio kweli kuwa ameshuka kiwango bali michuano hiyo haikuwa mizuri tu kwa upande wake
"Kuna wakati mchezaji unaweza kuonyesha kiwango kizuri na ukawafurahisha mashabiki lakini kuna wakati mwingine mambo huwa tofauti. Hilo ni jambo la kawaida kwa sisi wachezaji"
"Yawezekana sikucheza vizuri katika baadhi ya michezo kwenye michuano ya kombe la Mapinduzi lakini hiyo haina maana kuwa kiwango changu kimeshuka. Hali hiyo imetokea tu, nafahamu jukumu langu ni kuhakikisha naisaidia timu kila ninapopata nafasi," amesema
Wakati huo huo Salamba aliyetua Simba kutoka klabu ya Lipuli Fc, huenda akaelekea nchini Ubelgiji kufanya majaribio kwenye moja ya timu zinazoshiriki ligi kuu
Salamba amesema anasubiri kukamilika kwa baadhi ya masuala baina ya timu hiyo na uongozi wa Simba ili apate ruhusa ya kwenda kujaribu bahati yake nchini humo
