Jumamosi Januari 19, 2019 Simba itakuwa dimbani huko DR Congo kupepetana na AS Vita Club kwenye mchezo wa raundi ya pili ligi ya mabingwa, kundi D
Mabingwa hao wa Tanzania wanatarajiwa kuondoka keshokutwa kuelekea Congo tayari kwa mchezo huo.
Mshambuliaji wa Kimataifa Mganda Emmanuel Okwi amesema ataendeleza makali yake katika michezo yote atakayoshuka dimbani na kikosi cha Simba
Katika mchezo dhidi ya JS Saoura Okwi alihusika katika mabao yote ya Simba alifunga bao moja na kutengeneza mengine mawili yaliyofungwa na Meddie Kagere
Okwi amebainisha kuwa baada ya kupona majeraha yaliyokuwa yakimuweka nje mara kwa mara, ataendelea kuipigania Simba kila atakapopewa nafasi na kocha Patrick Aussems
"Kwa sasa nipo fiti na nitaendelea kupambana kwa ajili ya timu yangu, nilikuwa nashindwa kufanya vizuri kutokana na kusumbuliwa na maumivu ya mgongo ila kwa sasa maumivu yamekwisha ni mwendo wa kazi tu," amesema Okwi.
Simba inaongoza kundi D ikiwa na alama tatu na mabao matatu ikifuatiwa na Al Ahly yenye alama tatu na mabao mawili
AS Vital Club na JS Saoura zilifungwa katika michezo ya raundi ya kwanza hivyo hazina pointi
Wakati Vita Club ikiikaribisha Simba Jumamosi, Ijumaa JS Saoura itapepetana na Al Ahly nchini Algeria
