Viongozi wakuu wa klabu ya SImba jana walikuwepo uwanja wa Amaan kuwashuhudia vijana wao wakiilaza KMKM bao 1-0 kwenye mchezo wa kombe la Mapinduzi uliopigwa jana.
Ikumbukwe Simba imekuja Zanzibar ikiwa na malengo mawili, mosi kuhakikisha inatwaa ubingwa wa kombe la Mapinduzi unaoshikiliwa na Azam Fc lakini pia imetumia michuano hiyo kama sehemu ya mazoezi kwa kikosi chake ambacho Jumamosi ijayo kitakuwa uwanja wa Taifa kuikabili JS Sauora kwenye mchezo wake wa kwanza wa ligi ya mabingwa kundi D.
Viongozi hao wakiongozwa na Mkurugenzi mtendaji Cresentus Magori, Mwenyekiti Swedi Mkwabi, Mjumbe wa Bodi ya Wakurugenzi upande wa Mwekezaji Salim Abdallah 'Try Again' na Zawadi Ally walifika Zanzibar mapema jana na kufanya kikao na Benchi la Ufundi la Simba kabla ya mchezo dhidi ya KMKM
Simba huenda ikalazimika kugawa kikosi chake ili wachezaji wa kikosi cha kwanza warejee jijini Dar es salaam kuendelea na maandalizi ya mchezo wa ligi ya mabingwa huku wengine waendelee kushiriki michuano ya kombe la Mapinduzi.
