Mabingwa wa soka Tanzania Bara Simba leo wanaanza kampeni ya kuwania taji la kombe la Mapinduzi kwa kuchuana na Chipukizi Fc katika mchezo unaotarajiwa kupigwa saa mbili na robo usiku.
Kocha Mkuu wa Wekundu wa Msimbazi, Patrick Aussems leo huenda akashusha kikosi chake kamili kwani Simba itautumia mchezo huo kama sehemu ya maandalizi yake kuelekea mchezo wa ligi ya mabingwa dhidi ya JS Saoura utakaopigwa Jumamosi ya Januari 12, 2019
Mtaribu wa Simba Abbas Ally amesema maandalizi kuelekea mchezo huo yamekamilika na wana matumaini makubwa ya kufanya vizuri
"Tumekuja visiwani Zanzibar tukiwa na kikosi chetu kamili kwani tunatambua umuhimu wa michuano hii," amesema Abbas
"Tumejiandaa vizuri na wachezaji wetu wako tayari kwa ajili ya mchezo huo"
Kikosi cha Simba kitakuwa Zanzibar hadi Januari 08 ambapo kama timu hiyo itafuzu hatua inayofuata wachezaji wa kikosi cha pili wataendelea kubaki visiwani humo wakati wale wa kikosi cha kwanza watarejea jijini Dar es salaam kuendelea na maandalizi ya mchezo dhidi ya JS Souara.
