Msemaji wa klabu ya Simba Haji Manara amesisitiza kuwa timu hiyo iko tayari kuchuana na vigogo kuwania ubingwa wa Afrika na wale wasioamini wafike uwanja wa Taifa kushuhudia mchezo wa kwanza wa ligi ya mabingwa barani Afrika hatua ya makundi kati ya Simba dhidi ya JS Sauora utakaopigwa Jumamosi, Januari 12 2019.
Manara amesema Simba haihofii majina ya timu ilizopangwa nazo kundi D na watalithibitisha hilo kwa kuchukua alama zote tatu katika michezo yao itakayopigwa kwenye dimba la Taifa.
"Sahau kuhusu kundi letu la Ahly, Vita na Waalgeria,Simba hata ingepangwa na Barcelona, Man city na Juventus kwa hapa Dar tungechukua points zote tisa!!," ameandika Manara katika mtandao wake wa Instagram.
"Kama unadhani Simba ni dhaifu jisogeze Taifa jumamosi ya Januari 12 alasiri ujue tunafananaje," aliongeza Manara
Hivi karibuni kumejitokeza baadhi ya wachambuzi wa soka ambao wamekuwa wakitoa maoni kuwa Simba haitafua dafu kundi D kutokana na kupangwa na timu ambazo zimekuwa na mafanikio zaidi yake.
Lakini uongozi wa Simba na hata kocha Patrick Aussems amesisitiza kuwa kila timu ina nafasi sawa kundi D, kinachohitajika ni maandalizi na kujipanga ili kupata matokeo mazuri katika michezo ya nyumbani.
Simba imeweka mkakati wa kuhakikisha inashinda michezo yake yote itakayochezwa kwenye dimba la Taifa.
