Jumamosi ya Januari 12 2019 Simba itakuwa uwanja wa Taifa kuikaribisha JS Saoura ya Algeria kwenye mchezo wa kwanza wa ligi ya mabingwa barani Afrika, kundi D.
Simba ina faida ya kucheza nyumbani lakini pia itakuwa inakutana na timu ambayo kimsingi bado ina ugeni katika michuano ya Afrika.
Hii ni mara ya kwanza kwa JS Saoura kushiriki michuano ya ligi ya mabingwa barani Afrika, hatua ya makundi.
Timu hiyo haina miaka mingi sana tangu ianzishwe kwani ilianzishwa mwaka 2008.
Katika msimamo wa ligi kuu ya Algeria, JS Saoura inashika nafasi ya nne ikiwa imejikusanyia alama 23 baada ya kushuka dimbani mara 15. USM Alger ndio vinara wa ligi hiyo wakiwa na alama 33.
Timu hiyo pia ina wachezaji wawili tu wa kigeni mmoja akiwa ni Mtanzania Thomas Ulimwengu aliyesajiliwa mwezi uliopita baada ya kuvunja mkataba wake na klabu ya Al Hilal ya Sudan
Simba imejiwekea mkakati wa kushinda michezo yake yote ya nyumbani ili kusaka nafasi ya kutinga robo fainali ya michuano hiyo.
Matokeo ya ushindi dhidi ya JS Saoura itakuwa ni mwanzo mzuri kwa mabingwa hao wa Tanzania Bara katika kampeni yao ya kutinga robo fainali.
