Mashabiki wa Simba walikuwa na matumaini makubwa kwa usajili wa beki mpya Zana Coulibaly aliyetua Simba akitokea ASEC Mimosas katika usajili wa dirisha dogo lililofungwa Disemba 15.
Mchezaji huyo ambaye alisajiliwa kuchukua nafasi ya Shomari Kapombe ambaye alipata majeraha makubwa wakati akiitumikia timu ya Taifa, bado hajaonyesha kama anaweza kuvaa viatu vya Kapombe.
Akiwa ameitumikia Simba kwenye michezo mitatu, bado hajaonyesha makali yake hasa ikizingatiwa wengi wanamlinganisha na Kapombe ambaye kiwango chake kilikuwa juu zaidi. Kimsingi Kapombe ndiye winga/beki bora wa upande wa kulia nchini.
Juzi baada ya mchezo dhidi ya Singida United, Kocha Mkuu wa Simba Patrick Aussems aliwataka mashabiki wa timu hiyo kuwa na subira ili kupata mambo mazuri kutoka kwa Coulibaly ambaye anao uwezo wa kucheza nafasi zote za ulinzi na kiungo mkabaji.
Aussems alisema Coulibaly hakuwa dimbani kwa takribani miezi mitano hivyo anahitaji muda wa kucheza ili aweze kurejesha makali yake.
"Zana hajacheza kwa takribani miezi mitano, anahitaji kucheza mechi nyingi ili aweze kurejesha makali yake. Sina wasiwasi na uwezo wake, ni mchezaji mzuri, " alisema Aussems.
Coulibaly anatarajiwa kuongezwa kwenye kikosi cha Simba kitakachoshiriki michuano ya ligi ya mabingwa hatua ya makundi. Simba ikitarajiwa kushuka dimba la Taifa Januari 11 2019 kuikabili JS Souara ya Algeria
