Baada ya kuwafahamu wapinzani wao katika michuano ya ligi ya mabingwa barani Afrika, Simba sasa inaelekeza nguvu zake kwenye mchezo wa ligi kuu leo ambapo itacheza dhidi ya Singida United.
Mchezo huo utapigwa katika uwanja wa Taifa na utaanza saa moja usiku.
Akizungumza kuelekea mchezo huo, Msemaji wa klabu ya Simba Haji Manara amewataka mashabiki kujitokeza kwa wingi kuipa sapoti Simba.
"Matokeo tunayohitaji katika mchezo huo ni ushindi. Tunawataka mashabiki wajitokeze kwa wingi kuwaunga mkono wachezaji wetu watakaotuwakilisha katika mchezo huo," amesema
Simba inashika nafasi ya tatu kwenye msimamo wa ligi ikiwa imeshuka dimbani mara 13 na kujikusanyia alama 30.
Kutokana na kuwa na mchezo mingi ya kiporo (minne), Simba inahitaji kushinda michezo hiyo yote ili kuendelea kuwa sambamba katika mbio za ubingwa na timu za Yanga na Azam Fc ambazo ziko kileleni.
Kocha Mkuu wa Simba Patrick Aussems amesema wamefanya maandalizi ya kutosha na wana matumaini makubwa ya kuondoka na alama zote tatu uwanja wa Taifa leo
Simba imekuwa na rekodi nzuri ya kupata ushindi dhidi ya Singida United ambapo msimu uliopita kwenye mchezo uliopigwa uwanja wa taifa Simba ilishinda 4-0 na kisha kushinda kwa bao 1-0 katika mchezo wa duru ya pili uliopigwa mkoani Singida.
