Mkufunzi wa Mashujaa Fc ambayo leo inacheza na Simba uwanja wa Taifa katika mchezo wa kombe la FA (ASFC), ameweka wazi kuwa timu yake itakumbana na wakati mgumu kuikabili Simba ambayo imejipambanua kwa kuwa na kikosi kipana.
Aidha kocha huyo amesema hafahamu timu yake leo itachuana na Simba ipi? ile iliyoichapa KMC 2-1 au ile iliyotinga hatua ya makundi ya michuano ya ligi ya mabingwa barani Afrika kwa kuichapa Nkana Fc mabao 3-1?
Wakati kocha huyo akiingiwa na 'mchecheto', uongozi wa Simba umesema hautadharau mchezo huo na wanatarajia kocha Mkuu wa timu hiyo Patrick Aussems ataweka kikosi cha ushindani kuhakikisha wanatinga hatua ya 32 bora.
Simba haipaswi kudharau mchezo huo kwani inayo kumbukumbu ya msimu uliopita ilipotolewa na Green Worriors baada ya kudharau mchezo.
