Kulingana na taarifa zilizoripotiwa na vyombo vya habari nchini Uganda, Kaizer Chiefs iko mbioni kumsajili mshambuliaji tegemeo wa Simba Emmanuel Okwi ambaye leo amesherehekea kumbukumbu ya siku yake ya kuzaliwa.
Chiefs imeanza kumfuatilia Okwi kwa muda mrefu na uongozi wa Simba uliikataa ofa ya kwanza iliyotumwa na klabu hiyo inayoshiriki ligi kuu ya Afrika Kusini.
Hata hivyo Chiefs imetuma ofa nono zaidi inayoripotiwa kuwa dola laki moja (zaidi ya Mil 250) ikielezwa tayari makubaliano binafsi yamefikiwa baina ya Okwi na Chiefs na huenda mshambuliaji huyo wa Kimataifa wa Uganda akatua Chiefs mwezi ujao
Simba huenda ikalazimika kumuuza Okwi kwani mkataba wake unamalizika mwezi wa sita mwakani.
Kama hatauzwa au kuongezwa mkataba mpya basi ataondoka akiwa mchezaji huru mkataba wake utakapomalizika.
Ofa iliyotolewa na Chiefs ni kubwa kiasi kwamba Simba inaweza kuitumia kusajili hata wachezaji wawili wa Kimataifa wenye uwezo kama au zaidi ya Okwi.
