Uongozi wa klabu ya Simba umesema utatuma mwakilishi nchini Misri kwenye upangaji wa makundi ya michuano ya ligi ya mabingwa barani Afrika.
Hafla hiyo ambayo itafanyika siku ya Ijumaa, Disemba 28 katika jiji la Alexandrie, itarushwa mbashara runingani.
Rais wa Simba Suedi Nkwabi amesema mwakilishi wa Simba anatarajiwa kuondoka keshokutwa Disemba 27 2018 tayari kwa tukio hilo la historia.
Simba imetinga hatua ya makundi baada ya kuiondosha Nkana Fc kwa ushindi wa jumla wa mabao 4-3 baada ya kushinda 3-1 juzi katika dimba la Taifa licha ya kufungwa mabao 2-1 kwenye mchezo wa kwanza.
Nkwabi amesema Simba imedhamiria kufanya vizuri kwenye michuano hiyo hivyo wataanza maandalizi kabambe baada ya kuwafahamu wapinzani wao katika hatua hiyo.
Kwa sasa Simba inajifua kujiandaa na mchezo wa ligi kuu ya Tanzania Bara dhidi ya Singida United utakaopigwa kwenye uwanja wa Taifa Jumamosi, Disemba 29 2018
