Ushindi wa mabao 3-1 iliyopata Simba dhidi ya Nkana Fc jana uliwahakikishia mabingwa hao wa Tanzania Bara kutinga hatua ya makundi ya michuano ya ligi ya mabingwa barani Afrika.
Yalikuwa ni matokeo yaliyopokelewa kwa shangwe na Watanzania wakati huko nchini Zambia huzuni ilitawala baada ya Nkana kuungana na ZESCO kuondoshwa kwenye michuano hiyo.
Lakini jambo lililowashangaza zaidi Wazambia ni idadi kubwa ya mashabiki waliojitokeza uwanja wa Taifa jana kuiunga mkono Simba.
Baadhi ya mitandao ya habari za michezo nchini Zambia imeeleza kushangazwa na hali hiyo wakifananisha kuwa mchezo huo ni kama ulikuwa wa timu ya Taifa.
"Wazambia tujifunze kutoka Tanzania. Wenzetu mashabiki wamejaza uwanja wao utadhani inayocheza ni timu ya Taifa"
Lakini wasichojua ni kwamba licha ya mashabiki wa Simba kuipenda timu yao na kuwa nayo bega kwa bega pale wanapohitajika, msemaji wa klabu hiyo Haji Manara amekuwa akifanya kazi ya ziada kuwahamasisha mashabiki kwenda uwanjani.
Manara anaifahamu vyema kazi yake na ndio maana amekuwa msemaji wa klabu ya Simba kwa zaidi ya miaka mitano.
Msimu uliopita kwenye tuzo za Simba, Manara alishinda tuzo ya kuwa Mhamasishaji bora wa mwaka na hakuna shaka msimu huu atashinda tuzo hiyo pia
