Wiki iliyopita uongozi wa Simba kupitia kwa Msemaji wake Haji Manara ulianzisha kampeni ya KUFA NA KUPONA kuhakikisha mabingwa hao wa Tanzania Bara leo wanashinda na kutinga hatua ya makundi ya michuano ya ligi ya mabingwa.
Idadi ya kutosha ya mashabiki wamejitokeza uwanja wa Taifa leo na hakika ni furaha kwao kwani wameweza kuandika historia sambamba na kikosi cha Simba kilichotinga hatua ya makundi baada ya ushindi wa mabao 3-1.
Leo ni siku ya furaha kwa mashabiki na kila mmoja aliyeshiriki kwa namna moja au nyingine katika mafanikio haya ya Simba yaliyokuwa yakisubiriwa kwa hamu.
Benchi la Ufundi na wachezaji wa Simba wanastahili pongezi zaidi kwa kazi kubwa waliyoifanya leo kuhakikisha wanalipaisha jina la Simba na Tanzania barani Afrika.
Mwekezaji wa klabu ya Simba Bilionea Mohammed Dewji nae anastahili pongezi za pekee kwani uwekezaji wake umeanza kuzaa matunda na hakuna shaka mambo mazuri zaidi yanakuja Msimbazi
Kutinga hatua ya makundi ni mwanzo mzuri kwa kikosi cha Simba katika kampeni yake ya kusaka ubingwa wa Afrika
