Jumapili tutamaliza kazi uwanja wa Taifa - Bocco

John Bocco Nahodha wa Simba, mabingwa wa soka Tanzania Bara amesema wamepania kutinga hatua ya makundi ya michuano ya ligi ya mabingwa kwa kuhakikisha wanaibuka na ushindi kwenye mchezo dhidi ya Nkana Fc utakaopigwa Jumapili ijayo, Disemba 23 kwenye uwanja wa Taifa.

Bocco aliyefunga bao la Simba katika mchezo wa kwanza uliopigwa nchini Zambia na kumalizika kwa wenyeji Nkana kuibuka na ushindi wa mabao 2-1, amesema wanayo nafasi ya kufuzu hasa ikizingatiwa watakuwa wakicheza nyumbani

"Tutapambana zaidi ya mchezo wa kwanza ili kuhakikisha tunapata matokeo ambayo yatatupeleka hatua ya makundi," amesema Bocco

"Kama wao waliweza kupata matokeo ya ushindi wakiwa kwao, basi nasi kwa kushirikiana na benchi la ufundi tutaweza kushinda hapa nyumbani"

Simba itahitaji ushindi wa bao 1-0 kwenye mchezo huo wa Jumapili ili waweze kutinga hatua ya makundi.