Kwa Simba hii, yajayo yanafurahisha ligi ya mabingwa

Msimu huu Simba inaweza kurudia kile ilichofanya mwaka 1993 kwa kutinga fainali ya michuano ya kombe la Washindi (Sasa klabu bingwa) kutokana na uimara wa kikosi chake.

Baada ya kuiondosha Mbabane Swallows kwa ushindi wa jumla ya mabao 8-1, njia ni nyeupe kwa Simba kutinga hatua ya makundi ya michuano ya ligi ya mabingwa sasa ikibaki na michezo miwili tu kabla ya kutinga hatua hiyo.

Kocha Patrick Aussems ametengeneza timu imara inayocheza kandanda safi na la kuvutia. Kikosi hiki cha Aussems kinaweza kufanya mambo makubwa sana msimu huu.

Aidha Bilionea Mohammed Dewji 'MO' mwekezaji wa klabu ya Simba anastahili pongezi kwa uthubutu wake kwani uwekezaji aliofanya umetengeneza kikosi hiki cha maangamizi ambacho dalili zinaonyesha kuleta mambo makubwa huko mbeleni

Mbabane Swallows haikuwa timu ya kubeza, msimu uliopita ilitinga hatua ya makundi ya michuano ya ligi ya mabingwa.

Kipigo walichopata kinaakisi uimara wa kikosi cha Simba na sio kwamba timu hiyo ni dhaifu.

Kazi iliyobaki kwa Aussems na vijana wake ni kuhakikisha wanakamilisha hatua iliyobaki kwa kushinda michezo ya raundi ya kwanza ili kutinga hatua ya makundi.

Katika hatua hiyo kwa Simba hii lolote linaweza kutokea!