Ufafanuzi matukio ya 'kustaajabisha' mchezo wa Simba dhidi ya Lipuli Fc

Kile kilichodaiwa ni ushirikina baina ya wachezaji wa Simba na Lipuli, katika mechi yao ya Ligi Kuu Bara iliyochezwa jana Ijumaa uwanja wa Taifa jijini Dar es Salaam, kimefafanuliwa na wachezaji ambao wamefanya tukio hilo waliodai mchezo huo una vitu vizito tofauti na wanavyotazamwa na mashabiki wao.

Alianza kiungo wa Simba, Hassan Dilunga kugoma kutoka uwanjani baada ya kumalizika dakika 45 za mwanzo, alikuwa anamsubiri Ibrahim Job wa Lipuli atoke kwanza kisha yeye awe wa mwisho, kitu hicho kiliwastaajabisha mashabiki wengi.

Kipindi cha pili kipa wa Lipuli, Mohamed Ally na Miraji Athuman waliingia uwanjani kupitia sehemu ya kibendera.

Vituko hivyo vilizidi kuleta tafsiri ya aina yake katika mechi hiyo, iliyoisha kwa suluhu.

Mlinda lango wa Lipuli Fc Ally ambaye ni miongoni mwa waliohusika katika matukio hayo alisema hayo yalikuwa masuala ya imani tu.

"Kwenye mpira kuna vitu vizito, pengine kuliko unavyodhani kwa kutazama mpira unavyochezwa.

"Hizo ni imani za mtu husika unayemuona anafanya hivyo, ingawa mwisho wa picha soka ni uwanjani na dakika 90 lazima zitatoa mavuno kwa kila aliyecheza, mavuno yetu leo ni kuambulia pointi moja dhidi ya Simba,"alisema.

Kwa upande wa Athuman alitoa sababu ya kuingilia kwenye kibendera kuwa ilikuwa mbinu ya kuwatoa mchezoni wachezaji wa Simba kuhakikisha wanapunguza kasi ya mashambulizi.

"Unajua mpinzani anapoanza kukufanyia vituko, wewe fanya zaidi yake hapo ndipo unapommaliza mpinzani wako, nimeona mbinu zetu zimefanikiwa kupata suluhu uganini na timu kama Simba si jambo dogo,"alisema.

Mwanaspoti