Stars yaibana mbavu Benin

Timu ya Taifa ya Tanzania, Taifa Stars imeibana Benin kwenye dimba lake la nyumbani kwa kuilazimisha sare ya bao 1-1.

Benin ilianza kupata bao la kuongoza kwenye kipindi cha kwanza mfungaji akiwa winga wa zamani wa Sunderland Stephan Sessegnon kupitia mkwaju wa penati.

Hata hivyo, ilikuwa ni penalti ya mashaka, kwani mchezaji aliyeugusa mpira huo kwa mkono alikuwa ni wa Benin, Khaled Adenon lakini refa akadhani ni mchezaji wa Tanzania.

Benin ilitawala mchezo huo katika kipindi cha kwanza hata hivyo Stars ilibadilika kwenye kipindi cha pili ambapo ilifanikiwa kusawazisha bao kwenye dakika ya 55 mfungaji akiwa Elias Maguri.

Maguri aliupachika mpira kimiani akiunganisha vyema krosi ya Shiza Kichuya aliyewatoka walinzi na kumimina majaro kutoka upande wa kushoto.

Matokeo haya yanaweza kuisaidia Starskupanda ja[po kidogo kwenye viwango vya FIFA kwani Benin iko nafasi ya 78.

Kikosi cha Benin kilikuwa; Fabien Farnole, Rodrigue Fassinou, Khaled Adenon, Cedric Hountonji, David Kiki, Djiman Koukou, Olivier Verdon, Jodel Dossou, Stephane Sessegnon, David Djigla Dossou na Steve Mounie.

Tanzania; Aishi Manula, Himid Mao, Gardiel Michael, Abdi Banda, Kelvin Yondan, Hamisi Abdallah/Jonas Mkude dk75, Simon Msuva/Boniphace Maganga dk85, Mudathir Yahya/Nurdin Chona dk92, Elias Maguli, Raphael Daudi/Mbaraka Yusuph dk54 na Shizza Kichuya/Ibrahim Ajib dk65.