Tulikosa umakini - Aussems

Kocha Mkuu wa Simba Patrick Aussems amesema amesikitishwa na matokeo ya suluhu ya bila kufungana kwenye mchezo dhidi ya Yanga uliopigwa leo uwanja wa Taifa.

Akizungumza baada ya mchezo huo, Aussems amesema bado haamini kama timu yake ilishindwa kuibuka na ushindi kwenye mchezo huo.

"Bado siamini kama hatukushinda leo," amesema.

"Kwani tulikuwa na mchezo mzuri tukifanikiwa kutawala kwa muda mrefu. Tumetengeneza nafasi nyingi sana lakini tulikosa umakini."

"Kwenye mchezo wa leo tumedhihirisha sisi ndio timu bora hapa Tanzania. Ndio timu inayocheza kandanda safi kuliko timu zote kwenye ligi"

"Naamini mwenendo huu utatusaidia kwenye michezo ijayo ya ligi pamoja na michuano ya ligi ya mabingwa barani Afrika," amesema Aussems.

Kwenye mchezo wa leo Simba ilitengeneza zaidi ya nafasi kumi lakini haikuwa na bahati ya kuutumbukiza mpira kimiani.