Try Again awataka mashabiki Simba wawarushie wachezaji fedha timu ikishinda

Kaimu Rais wa Simba, Salim Abdallah 'Try Again' amewataka mashabiki wa klabu hiyo kuwarushia fedha wachezaji na makocha wanaposhinda kama walivyorusha chupa timu inapofungwa.

Kauli ya kiongozi huyo imekuja baada ya wachezaji na viongozi kurushiwa chupa na mashabiki wa Simba wa Mwanza baada ya kuchapwa bao 1-0 na Mbao jana.

Matokeo hayo yaliamsha hasira kwa mashabiki wengi wa klabu hiyo waliofika kushuhudia mchezo huo na baada ya filimbi ya mwisho ya mwamuzi, Jonesia Rukyaa walianza kuwarushia chupa za maji viongozi, kocha na wachezaji.

Afisa habari wa Simba, Haji Manara aliyekuwa mhanga zaidi wa tukio hilo baada ya kurushiwa chupa nyingi na mashabiki huku wakisikika wakisema kuwa kocha msaidizi Masoud Djuma haondoki ndani ya klabu hiyo.<

Try Again alisema ni jambo baya ambalo mashabiki wa klabu hiyo wamefanya mkoani Mwanza.

"Kitu kibaya wamefanya kwani viongozi wanahangaika kuhakikisha timu inafanya vizuri halafu wao wanakuja na hasira zao na kurusha chupa. Mbona timu ikishinda hawawarushi wachezaji fedha waokote.

"Sio utamaduni, sio uzalendo, sio mchezo wa kiungwana. Watu wanaacha familia zao, kazi zao kwa ajili ya timu, halafu shabiki anaibuka anafanya hivyo, haisaidii timu. Kama wameanzisha utaratibu huo wa kurusha chupa timu ikifungwa basi warushe hela na dhahabu timu ikishinda," alisema Salim ‘Try Again’.

Mwanaspoti