Huu utaratibu wa kuwashambulia viongozi, wachezaji na makocha baada ya kufungwa haufai

Jana Simba imefunga bao 1-0 na Mbao FC kwenye mchezo wa ligi kuu ya Tanzania Bara uliopigwa dimba la CCM Kirumba.

Matokeo hayo hayakufurahiwa na kila mmoja wetu kwani haikuwa malengo ya timu kwenda kufungwa. Yemekuwa ni matokeo tu ya mchezo.

Mpira wa miguu una matokeo matatu yaani kushinda, kufungwa na pia kutoka sare. Lolote linaweza kutokea kwani hakuna timu ambayo imeandikiwa kushinda michezo yote.

Lakini jambo la kusikitisha ni kwa baadhi ya mashabiki wa Simba ambao jana waliwafanyia vurugu viongozi, makocha na wachezaji baada ya kupoteza mchezo.

Wapo mashabiki waliodiriki kuwarushia mawe na chupa wachezaji na kocha Patrick Aussems wakati wanatoka uwanjani.

Msemaji wa klabu ya Simba Haji Manara yeye alikuwa kwenye wakati mgumu zaidi kwani alishambuliwa uwanjani kwa kurushiwa chupa lakini pia ameendelea kushambuliwa kwa matusi kwenye mitandao ya kijamii.

Huu sio ustaarabu na ni vyema Wana Msimbazi tutakubaliana kuwa utamaduni huu haufai hata kidogo.

Matokeo ya jana wamemuuma kila mmoja, tufuate njia sahihi kuonyesha hasira zetu na sio kuwashambulia (kwa silaha) viongozi na wachezaji wa Simba.

Tukio lile la kuwapiga na chupa wachezaji linaweza kuwafanya washuke morali kwani ilipaswa waungwe mkono katika nyakati zote.

Tuwapongeze wakifanya vizuri lakini pia tuwaunge mkono na tuwatie moyo pale wanapofanya vibaya. Upendo utawafanya wajihisi wana deni kubwa kwa mashabiki wao.

Lakini chuki itawafanya wajihisi hawathaminiwi na kuacha kuipigania timu kwa moyo wote.