Mwanachama wa Klabu ya Simba SC, Hassan Bakari Kakayoo, maarufu kama Mzee wa Saluti, amejitosa katika kinyang’anyiro cha kuwania nafasi ya ujumbe wa Bodi ya Wakurugenzi ya klabu hiyo baada ya kuchukua fomu ya kuwania nafasi hiyo.
Akizungumza leo, Novemba 18, 2026, katika ofisi za Shirikisho la Mpira wa Miguu Tanzania (TFF), jijini Dar es Salaam, Kakayoo amesema uamuzi wake wa kuchukua fomu unatokana na kutekeleza haki yake ya msingi ya kikatiba kama mwanachama wa Simba.
Mzee wa Saluti amemshukuru Mwenyezi Mungu kwa kumwezesha kufika salama na kukamilisha hatua hiyo muhimu, huku akisisitiza kuwa bado kuna taratibu na miongozo inayopaswa kufuatwa kabla ya kuzungumzia kwa kina masuala ya kampeni.
Kakayoo amefichua kuwa hii ni mara yake ya pili kuchukua fomu ya kuwania nafasi hiyo, baada ya kufanya hivyo pia mwaka 2022, ambapo hadi sasa amehifadhi risiti pamoja na nyaraka za wakati huo kama vielelezo.
Akihitimisha mazungumzo yake, Mzee wa Saluti amesema amemkabidhi Mwenyezi Mungu safari yake ya kuwania nafasi hiyo.