Baada ya kalenda ya FIFA kuhitimishwa hapo jana, mwishoni kwa wiki mikiki mikiki ya ligi kuu na mashindano mengine itarejea.
Vinara wa ligi kuu ya NBC Simba wao watashuka dimbani Jumamosi, Novemba 21 pale dimba la Isamuhyo kuwakabili maafande wa JKT Tanzania.
Huo utakuwa mchezo wa raundi ya 11 Simba ikisaka rekodi ya kushinda mechi ya 11 mfululizo msimu huu.
Baada ya mtanange huo Mnyama atakamilisha mwezi Novemba kwa mchezo wa kwanza wa hatua ya makundi CAFCL dhidi ya Orlando Pirates.
Mchezo huo utapigwa uwanja wa Uhuru, Novemba 29 muda mchezo huo ukitarajiwa kupigwa saa 10 jioni.
Kocha Steve Barker na vijana wake wanaendelea na maandalizi Mo Simba Arena ili kuhakikisha vipigo vinaendelea kwa kila anaekuja mbele.
Habari njema kwa Simba ni urejeo wa wachezaji waliokuwa kwenye majukumu ya timu za Taifa.
Anthony Mligo na mlinda lango Djibrilla Kassali wako tayari kuendelea na majukumu yao wakati Nathaniel Chilambo akikosekana kwa wiki kadhaa kutokana na majeraha aliyopata kwenye mchezo dhidi ya Nigeria wakati akiitumikia Taifa Stars.