Mchakato wa uchaguzi wa viongozi wapya wa Klabu ya Simba umeendelea kushika kasi baada ya wanachama zaidi kujitokeza kuchukua fomu za kuwania nafasi mbalimbali za uongozi, huku ajenda za umoja, mabadiliko ya klabu na ushirikishwaji wa vijana zikitawala kwa baadhi ya wanaotaka kuingia madarakani.
Mwenyekiti wa Kamati ya Uchaguzi ya Shirikisho la Mpira wa Miguu Tanzania (TFF), Wakili Kiomoni Kibamba, amesema zoezi la uchukuaji wa fomu linaendelea vizuri na kwa utaratibu uliopangwa.
Kibamba amesema hayo wakati akizungumzia mwenendo wa mchakato huo ambao TFF imeamua kuusimamia kufuatia kuwepo kwa mvutano kati ya pande mbili kuhusu usimamizi wa uchaguzi huo.
"Hadi sasa zoezi la kuchukua fomu linaendelea vizuri, kila kitu kinaenda sawa, hilo ndilo ninaloweza kuzungumza kwa sasa," amesema Kibamba.
Zoezi hilo lilianza rasmi Novemba 16, 2026, ambapo miongoni mwa waliojitokeza kuchukua fomu ni Geofrey Nyange Kaburu anayewania nafasi ya mwenyekiti pamoja na Christopher Mwansasu anayewania nafasi ya ujumbe wa Bodi ya Wakurugenzi.
Leo, Novemba 17, 2026, Agness Daniel maarufu kama 'Aggy Simba' naye amechukua fomu ya kuwania nafasi ya ujumbe wa klabu hiyo.
Wengine waliojitokeza katika mchakato huo ni mwanachama Francis Kumba Ndulane, aliyechukua fomu ya kuwania ujumbe wa bodi ya klabu akieleza kuwa ana uzoefu wa kutosha katika shughuli za Simba na anaamini anaweza kutoa mchango mkubwa katika maendeleo ya timu hiyo.
Ndulane, ambaye ni mwanachama hai wa tawi la Ifakara na amewahi kuwa kiongozi wa tawi hilo, amesema uzoefu wake unahusisha pia kushiriki misafara ya timu, ikiwamo safari ya Zambia Desemba 2018 kwa ajili ya mchezo dhidi ya Nkana, akiwa kiongozi wa msafara.
Kwa upande mwingine, Anindumi Jonas ametangaza nia ya kuwania nafasi ya mwenyekiti wa Simba, akibeba ajenda kuu tatu ambazo ni mabadiliko ya klabu, kuboresha mfumo wa uanachama na kuwapa vijana nafasi katika uongozi.
Jonas amesema amekuwa mwanachama wa Simba kwa miaka 20, amesisitiza umuhimu wa kuweka utaratibu unaoeleweka katika mchakato wa mabadiliko ya klabu hiyo ili kuhakikisha uendeshaji wake unakuwa katika mfumo mzuri na wenye mwelekeo.
Naye Christopher Kabalika Mwataso amejitokeza kuchukua fomu za kuwania nafasi ya Mjumbe baada ya kufika katika ofisi za TFF Novemba 16, 2026.
Mwataso amesema dhamira yake ni kushiriki katika mchakato wa uchaguzi ili kupata nafasi ya kuwatumikia wanachama na kusaidia kuiongoza Simba katika hatua bora zaidi, akiahidi kueleza kwa kina mipango na matarajio yake baada ya kukamilika kwa zoezi la uchukuaji wa fomu.
Farid Awadhi nae ametangaza nia ya kuwania nafasi ya ujumbe wa klabu hiyo, akieleza kuwa moja ya vipaumbele vyake ni kuunganisha wanachama na kuondoa makundi yanayoonekana kujitokeza ndani ya Simba.
Kwa mujibu wa ratiba iliyotangazwa na Kibamba, uchaguzi huo utafanyika Januari 30, 2027, badala ya Januari 3 kama ilivyokuwa imepangwa awali. Hatua hiyo inalenga kuwawezesha viongozi watakaochaguliwa kupokea rasmi majukumu kutoka kwa viongozi wanaomaliza muda wao chini ya mwenyekiti wa sasa, Murtaza Ally Mangungu.