Klabu ya Simba SC imeibua maswali mazito kuhusu mwenendo wa Mwenyekiti wa Kamati ya Uchaguzi ya Shirikisho la Mpira wa Miguu Tanzania (TFF), ikieleza kutoridhishwa na namna ambavyo amekuwa akishughulikia masuala yanayohusu klabu hiyo, hususan katika kipindi hiki cha kuelekea uchaguzi mkuu wa klabu.
Katika taarifa yake kwa umma iliyotolewa Novemba 15, 2026, Bodi ya Wakurugenzi ya Simba imeweka wazi msimamo wake kuhusu mwenendo wa mchakato wa uchaguzi, huku ikieleza kutoridhishwa na kitendo cha Mwenyekiti huyo kujibu barua rasmi ya klabu kupitia vyombo vya habari badala ya kutumia utaratibu rasmi wa mawasiliano.
Kwa mujibu wa taarifa hiyo, Simba iliiandikia TFF barua rasmi Novemba 13, 2026, ikiwasilisha msimamo wake kuhusu mwenendo wa mchakato wa uchaguzi, kutoa mapendekezo ya maboresho na kuomba majibu rasmi kwa maandishi.
Hata hivyo, klabu hiyo imesema haioni kuwa ni sahihi kwa kiongozi wa chombo kinachosimamia uchaguzi wa mpira wa miguu kujibu barua rasmi ya klabu kupitia vyombo vya habari kabla ya kuipatia klabu majibu ya maandishi.
Simba imeomba TFF kutoa majibu rasmi ya maandishi kupitia barua hiyo.
Katika hatua nyingine, Simba imepinga kauli iliyotolewa na Mwenyekiti huyo kuhusu uwepo wa pande mbili zinazopingana ndani ya klabu.
Mwenyekiti huyo alieleza kuwa kuna ofisi mbili, moja ya Mwekezaji iliyopo Masaki na nyingine ya Mwenyekiti Murtaza Mangungu iliyopo Msimbazi.
Simba imeeleza kuwa kauli hiyo si sahihi kwa kuwa inatoa taswira ya kuwepo kwa taasisi mbili tofauti ndani ya klabu moja.
Bodi hiyo imesema kauli hizo zinaweza kuongeza mkanganyiko miongoni mwa wanachama na wadau wa klabu, huku zikiwa na athari za kisheria.
Msisitizo wa Simba ni kwamba ni taasisi moja na inapaswa kutambuliwa hivyo na kila mdau anayehusika na masuala ya uchaguzi.
SIMBA YATAKA UCHAGUZI HURU NA WA HAKI
Pamoja na hoja hizo, Bodi ya Wakurugenzi imesisitiza dhamira yake ya kuhakikisha uchaguzi wa klabu unakuwa huru, wa haki, wazi na unaoaminika.
Simba imeeleza kuwa msimamo wake unatokana na Katiba ya klabu, Kanuni zake za Uchaguzi pamoja na kanuni za TFF na FIFA, katika misingi ya kuheshimiana na kuelewana.
Aidha, klabu imesema hatua zaidi za kisheria zitazingatiwa dhidi ya Mwenyekiti wa Kamati ya Uchaguzi ya TFF.