Klabu ya Simba SC imelazimika kutafakari upya mpango wake wa kuweka kambi ya maandalizi nchini Kenya, kufuatia hofu ya mlipuko wa ugonjwa wa Ebola na masharti ya usafiri yanayoweza kuathiri safari yake ya kuelekea Morocco.
Simba ilikuwa imepanga kutumia muda nchini Kenya kujiandaa kwa michezo ijayo ya Ligi ya Mabingwa Afrika pamoja na Ligi Kuu Tanzania Bara. Hata hivyo, hali ya kiafya inayohusishwa na Ebola imeibua wasiwasi ndani ya klabu hiyo na kufanya mpango huo kuwa na mashaka.
Mbali na suala la usalama wa kiafya, kuna kikwazo kingine kinachohusiana na taratibu za kuingia nchini Morocco. Masharti yaliyowekwa na nchi hiyo yanawataka wasafiri wanaotoka Kenya, Jamhuri ya Kidemokrasia ya Congo (DR Congo) na Uganda kusubiri siku 30 tangu walipotoka katika mataifa hayo kabla ya kuruhusiwa kuingia Morocco.
Hali hiyo imeifanya Simba kuwa makini zaidi, kwani ina safari muhimu ya kucheza na RS Berkane nchini Morocco katika mchezo wa pili wa hatua ya makundi ya Ligi ya Mabingwa Afrika, utakaofanyika kati ya Desemba 18 na 20, 2026.
Akizungumzia suala hilo, Meneja Habari na Mawasiliano wa Simba, Ahmed Ally, ameeleza kuwa uongozi bado unalifanyia tathmini kuhusu mkakati wao wa maandalizi. Amesema taarifa rasmi kuhusu uamuzi wa mwisho inatarajiwa kutolewa ndani ya siku mbili zijazo.
Awali, Wekundu wa Msimbazi walikuwa wamekubali mwaliko wa Gor Mahia ya Kenya kwa ajili ya mchezo wa kirafiki uliopangwa kufanyika Novemba 15, 2026. Mechi hiyo ni sehemu ya kumbukizi ya mwaka mmoja tangu kufariki kwa aliyekuwa Waziri Mkuu wa Kenya, Raila Odinga.