Wakati kikosi chake kikirejea mazoezini baada ya mapumziko, Kocha Mkuu wa Simba Steve Barker amehitaji angalau mechi mbili za kirafiki ikiwa ni sehemu ya maandalizi kuelekea hatua ya makundi ya ligi ya mabingwa.
Msimu huu Barker na vijana wake wameuanza kibabe wakishinda mechi zote walizocheza kwenye mashindano yote.
Mkakati wa Simba ni kuhakikisha wanaendeleza moto huo mkakati maalum ukiwekwa kwenye ligi ya mabingwa ambapo Wekundu wa Msimbazi wanahitaji kuvuka hatua ya makundi.
Barker ameeleza umuhimu wa mechi hizo za kirafiki akiamini zitasaidia katika kukiandaa kikosi chake kiushindani kuelekea kwenye ratiba hiyo inayofuata baada ya mapumziko ya FIFA.
“Tunafahamu kuwa hatua ya makundi ni ushindani tofauti na ule tuliokutana nao katika raundi za awali. Tunahitaji kutumia kipindi hiki kuboresha maeneo ambayo tuliona changamoto, kuongeza ushindani ndani ya kikosi na kuhakikisha wachezaji wanaingia katika michezo hiyo wakiwa tayari. Lengo letu ni kushindana na kuhakikisha tunafanya vizuri zaidi ya msimu uliopita.”
"Michezo ya kirafiki ni sehemu muhimu ya maandalizi kwa sababu inatupa nafasi ya kupima namna mbalimbali ya uchezaji, kuimarisha maelewano baina ya wachezaji na kutathmini utimamu wao kabla ya kukutana na wapinzani wenye uzoefu mkubwa wa mashindano ya Afrika," alisema
Awali Simba ilialikwa nchini Kenya kushiriki kumbukumbu ya Raila Odinga, hata hivyo changamoto ya ugonjwa ebola huenda ikakwamisha mpango huo.