Kocha Mkuu wa Simba, Steve Barker, ameweka rekodi ya kipekee tangu alipojiunga na klabu hiyo Desemba 2025, akiiongoza timu hiyo kucheza mechi 35 za Ligi Kuu Bara bila kupoteza, huku akifikisha ushindi 20 mfululizo.
Barker, ambaye ni raia wa Afrika Kusini, ameifanya Simba kuwa moja ya timu zenye mwendelezo mkubwa wa matokeo mazuri, akiiwezesha kukusanya pointi 30 baada ya kushinda mechi zote 10 ilizocheza katika Ligi Kuu msimu huu wa 2026/27.
Rekodi ya kutopoteza mechi 35 inajumuisha ushindi 28 na sare saba, huku kikosi chake kikifunga mabao 66 na kuruhusu 14, jambo linaloonyesha uimara wa timu hiyo katika safu ya ushambuliaji na ulinzi.
Katika kipindi hicho, Simba imekusanya pointi 91 kati ya 105 zilizokuwa zikigombaniwa, ikiwa ni wastani wa pointi 2.6 kwa kila mchezo.
Mbali na rekodi hiyo, Barker ameifikisha Simba kwenye ushindi wa mechi 20 mfululizo za ligi, mfululizo ulioanza Mei 6, 2026, ilipoifunga JKT Tanzania bao 1-0.
Katika mechi hizo 20, Simba imefunga mabao 43 na kuruhusu nane pekee, ikionyesha namna ilivyoimarika chini ya kocha huyo.
Ushindi wa hivi karibuni wa mabao 3-2 dhidi ya Namungo FC kwenye Uwanja wa Uhuru, Dar es Salaam, Novemba 2, 2026, umeongeza uzito wa rekodi hiyo baada ya Simba kurejea mchezoni na kupata pointi tatu licha ya kwenda mapumziko ikiwa nyuma kwa mabao 2-1.
Mafanikio ya Barker hayaishii kwenye mashindano ya ndani pekee, kwani ameiongoza Simba kufuzu hatua ya makundi ya Ligi ya Mabingwa Afrika msimu huu, baada ya kuonyesha ubora katika hatua za awali.
Simba iliondoa Mighty Wanderers ya Malawi kwa jumla ya mabao 7-1, kabla ya kuifunga 15 de Agosto ya Equatorial Guinea kwa jumla ya mabao 9-1, hivyo kufikisha mabao 16 katika hatua hizo mbili za mtoano.
Katika ligi ya ndani, Simba inaongoza msimamo ikiwa na pointi 30, ikifuatiwa na Yanga yenye pointi 25 na Azam FC yenye pointi 23.
Uthabiti wa matokeo, uwezo wa kurejea katika michezo migumu na nidhamu ya kiuchezaji ni miongoni mwa mambo yanayoonekana kuwa msingi wa mafanikio ya Barker tangu alipotua Msimbazi.
Kwa rekodi ya mechi 35 bila kupoteza na ushindi 20 mfululizo, kocha huyo ana nafasi ya kuandika historia ambayo inaweza kuchukua muda mrefu kuvunjwa na makocha wengine watakaopita katika benchi la ufundi la Simba.
Hata hivyo, mtihani mkubwa uliopo mbele yake ni kuendeleza kasi hiyo, kuhakikisha Simba inatwaa ubingwa wa Ligi Kuu Bara na kufanya vizuri katika hatua ya makundi ya Ligi ya Mabingwa Afrika.
Kwa sasa, Barker tayari ameweka msingi wa rekodi kubwa Msimbazi, lakini macho ya mashabiki wa Simba yanatizama mafanikio makubwa ambayo kocha huyo atayaleta Msimbazi msimu huu wa 2026/27.
