Shirikisho la Mpira wa Miguu Tanzania (TFF) limeamua kusimamia moja kwa moja mchakato wa uchaguzi wa klabu ya Simba SC baada ya kubaini mapungufu katika ratiba na utaratibu wa uchaguzi uliotangazwa awali na klabu hiyo.
Hatua hiyo inalenga kuhakikisha uchaguzi huo unafanyika kwa kuzingatia Katiba ya klabu, kanuni za uchaguzi pamoja na taratibu zinazotakiwa kisheria.
Mwenyekiti wa Kamati ya Uchaguzi ya TFF, Wakili Kiomoni Kiburu Kibamba, amesema uamuzi huo umefikiwa kufuatia kamati yake kupokea malalamiko kuhusu utaratibu uliotumiwa na Bodi ya Wakurugenzi ya Simba Sports Club Company katika kuandaa mchakato wa uchaguzi.
Kwa mujibu wa Kibamba, kamati ilipokea barua mbili kupitia Ofisi ya Katibu Mkuu wa TFF. Barua ya kwanza ilihusu taarifa ya kuanza kwa mchakato wa uchaguzi wa Simba SC, huku barua ya pili ikiwa na malalamiko kuhusu utaratibu uliotumiwa na bodi hiyo.
Kutokana na malalamiko hayo, Kamati ya Uchaguzi ya TFF iliamua kuwaita na kuwasikiliza wahusika wa pande zote kabla ya kutoa maelekezo kuhusu namna mchakato huo utakavyoendelea.
Kibamba ameeleza kuwa katika mazungumzo hayo walikutana na wawakilishi wa pande mbili zinazohusika, akiwamo Crescentius Magori aliyewakilisha upande wa mwekezaji na Murtaza Mangungu aliyewakilisha upande wa wanachama.
Hata hivyo Kibamba amesema kutokana na mapungufu waliyoyabaini kwenye ratiba ya uchaguzi iliyotolewa awali, watahitaji kuiboresha ratiba hiyo kabla ya kutangaza mchakato sahihi kuelekea uchaguzi huo.
