Kuelekea mchezo wa Ligi Kuu Tanzania Bara kati ya Simba SC na Namungo FC, klabu ya Namungo imetuma ujumbe mzito kwa Wekundu wa Msimbazi kupitia barua ya wazi iliyochapishwa na klabu hiyo.
Kupitia barua hiyo yenye kichwa cha habari “Barua kwa Simba”, Namungo FC imeeleza kusikitishwa na taarifa za malalamiko kutoka kwa baadhi ya timu ndogo zilizokutana na Simba kabla ya mchezo wao.
Namungo imeeleza kuwa imeamua kulibeba suala hilo na kulifanya kuwa jambo la kitaifa, huku ikiahidi kuhakikisha inatoa kipigo kwa Simba ili iwe fundisho.
Katika sehemu ya barua hiyo, Namungo imeandika:
“Wauaji wa Kusini tumelibeba swala hili na kuwa jambo la kitaifa, hivyo tutahakikisha tunawapiga kipigo cha paka mwizi ili iwe fundisho.”
Ni wazi huu ni uchokozi wa waziwazi! Simba SC itaingia kwenye mchezo huo ikiwa na rekodi nzuri ya mwanzo wa msimu, ikiwa imeshinda michezo yote tisa ya awali na kuendelea kushikilia nafasi ya kileleni mwa msimamo wa ligi.
Mchezo huo unatarajiwa kuchezwa Jumatatu, Novemba 02, katika Uwanja wa Uhuru jijini Dar es Salaam, ambapo Simba itakuwa mwenyeji wa Namungo FC.
