Klabu ya Simba SC imeingia rasmi kwenye ukurasa mpya wa maboresho ya benchi lake la ufundi baada ya kumtangaza kocha wa zamani wa timu ya taifa ya Zambia, Honour Janza, kuwa Mkurugenzi mpya wa Ufundi wa klabu hiyo.
Uamuzi huo umetangazwa rasmi na uongozi wa miamba hiyo ya Msimbazi leo, ikiwa ni sehemu ya mikakati ya klabu hiyo kuimarisha mifumo yake ya soka kuanzia timu za vijana hadi timu ya wakubwa.
Janza anakuja na uzoefu mkubwa wa soka la Afrika. Hapa nchini, jina lake si geni kwani amewahi kuhudumu kama Kocha Mkuu wa Namungo FC na baadaye kukabidhiwa mikoba ya kuifundisha timu ya taifa ya Tanzania (Taifa Stars) kwa vipindi tofauti kati ya mwaka 2022 na 2023.
Kimataifa, mafanikio makubwa ya Janza yalikua mwaka 2015 alipoiongoza timu ya taifa ya Zambia (Chipolopolo) kwenye michuano ya Kombe la Mataifa ya Afrika (AFCON).
Aidha, amewahi kushika wadhifa huo huo wa Mkurugenzi wa Ufundi ndani ya klabu ya ZESCO United ya nchini kwao, hatua inayomfanya kuwa mtu sahihi katika nafasi hiyo mpya ndani ya wekundu wa Msimbazi.
Ujio wa Mzambia huyu unatarajiwa kuongeza tija katika usajili, uratibu wa masuala ya kiufundi na kusimamia falsafa ya soka la Simba.
